由 Hong Kong IDDSI Reference Group 舉辦嘅《2024 IDDSI香港座談會：由廚房到廳堂》已經喺上星期五，五月十七日圓滿結束！
喺當日我哋好榮幸可以同世界各地嘅專才同埋喺照護食領域嘅領袖，一齊傾吓照護食而家嘅狀況，亦都同時探討下照護食未來嘅發展，而同場我哋好開心可以品嘗到唔同機構提供嘅照護食。
當日，社聯行政總裁蔡海偉先生喺開幕儀式中致詞，佢鼓勵我哋大家都一齊投入香港照護食嘅發展。社聯業務總監譚穎茜博士亦都喺同場同參加者分享社聯照護食計劃嘅内容、社聯擔任嘅角色同解釋照護食嘅生態系統。而最後佢更加同我哋一起展望未來，分享社聯甚或香港應該喺照護食呢條道路上，點樣繼續發展。
座談會嘅成功有賴各界專業人士精彩嘅分享，而每一個專業人士嘅演講都令我哋擴闊視野，同時了解照護食嘅過去，以及未來嘅發展方向，亦都畀我哋從國際經驗中搵到香港照護食嘅方向。
一次嘅座談會又點會足夠，我哋期待未來會有更多照護食嘅活動，更加期盼有你哋每一個人嘅參與。等我哋一齊為照護食嘅未來出一分力啦！
Comments